香港新浪網 MySinaBlog
« 上一篇 | 下一篇 »
Maggie | 25th Sep 2014, 11:41 PM | 蝸居裝修 | (7836 Reads)

jul 20

今日再去名家廚落實設計圖, 順便揀埋料

Picture

設計上沒有大變動, 除左個暗桶稍為縮短一點(原因是想飯廳位再鬆動一點), 連帶廚櫃門在數字上再縮短多一點; 廚櫃底板縮高, 留待師傅w預裝兩支T5光管在兩側; 檯面如我所要求, 比一般標準高度稍為矮一點; 近洗衣機下排的櫃桶門鉸, 依名家廚建議轉了170度的門鉸, 原因是通道太窄, 90度開的門會擋住條路, 拎野都唔方便, 依家換個加大角度既鉸會方便d

因為我們是開放式廚房, 左手邊的位置會有部雪櫃, 所以加了個側板, 至於側水擋就無加到, 距離鋅盤都有一段距離, 應該唔會倒到水去果邊

整組櫃由一開始已經打算用formica 3200L既白皮暗紋(ultra white)

PicturePicture

除左formica, 其實仲有西德板可以揀, 款式看上去比formica多, 不過名家廚建議formica質量比較好. 一開始其實想揀木紋板, 考慮到全屋既地磚都係木紋, 再揀木紋好似好深色 

因為想製造比較開揚既感覺, 又喜歡簡潔的款式, 所以選了白, 哲爸一向喜歡皮紋, 而這隻仿皮紋低調得來又有少少款, hit中晒我們的喜好, 襯埋我地揀既黑白灰西班牙花磚, 效果應該唔錯. 雖然很多人怕難清潔打理, 廚房未必會揀白色(仲要唔係焗漆), 不過揀白色都有個好處, 就係提醒自己要經常清潔, 盡量keep住光鮮潔白

檯面想揀灰色, 但套餐內唔包灰色要另加錢, 呢d咁minor既緊都係揀返普通既鹽白corian IS528就可以了

最頭痛既反而係決定用暗抽定手抽. 暗抽當然靚又整潔, 不過要加錢, 好肉赤, 明抽就方便拉出拉入, 但d款式麻麻地, 而且突出黎都怕容易撞到受傷; 之前在家合居同淘寶都有睇過d特色手抽, 不過又睇唔岩, 而且手抽長度不一, 他日個手抽有咩問題, 要換返一模一樣既長度唔知易唔易搵得返

PicturePicture

暗抽都有分兩種, 一種係斜抽, 如圖見到個抓手位係斜的, 老實講暗抽真係靚仔又方便, 不過貴囉...

Picture

另一種做法就係跌一級, 呢隻會平d, 每道門收$100, 個樣望落都幾大體. 經過一翻考慮之後, 都洗左咁多錢落套廚櫃, 都唔差在果幾隻門果幾百蚊可以更簡潔更靚仔...

PicturePicture

鋅盤. 套餐可以選用corian無縫盤, 不過用corian唔可以太高溫, 即係太熱既水倒落去有機會會破裂, 而鋅盤就唔洗擔心呢個問題, 唯一只係無咁美觀, 但就唔洗擔心corian會色食, 會爆會裂而且易花, 更換上來都比鋅盤麻煩. 所以決定用套餐提供既鋅盤, 套餐所包既size已經比以前用緊既深, 有雙鋅盤固然方便好用, 但我情願工作既檯面大, 實用性比雙鋅盤既高

Picture

廚櫃都揀得七七八八, 另外我地仲搵埋名家廚幫我地做返個同色既廁櫃. 買現成既睇唔岩心水, 依家做埋同廚房一樣款既櫃, 整體感覺好一致, 唔會好雜亂

PicturePicture

廁櫃就無做暗抽, 用返套餐提供既手抽就算. 廁所空間比較小, 原本想揀d圓圓地角既安全d, 但圓角既款又鈍鈍地唔夠靚仔, 最後都係睇樣份上, 揀左最襯最靚但最尖既E819

簽完圖, 比埋個尾數, 正式開單做櫃喇, 希望出黎既效果好, 好期待見到廚房既大變身!


[1]

有冇廚櫃完成品看看?白色皮紋門板靚否靚?


[引用] | 作者 hilary | 19th Mar 2015 1:31 AM | [舉報垃圾留言]