香港新浪網 MySinaBlog
« 上一篇 | 下一篇 »
Maggie | 23rd Sep 2014, 1:13 AM | 給哲瑜的話。六歲, 給初一的話。兩歲 | (541 Reads)

最後一個幼稚園雞的暑假, 很想每天都出去玩得高高興興, 暑假開始時有兩星期半天的小學適應課, 中途也要(帶住兩件)為新舊居頻頻撲撲做跑腿, 哪處都去不成, 臨近開學的時候又要執箱搬屋趕入伙同上模擬小學課程, 著實可以玩的時間不算多, 不過依然盡我能力帶住大細劉生四處玩, 希望哲哲和細佬都能感受到

Picture

暑假第一擊, 就係落商場去戲院睇早場! 幾乎每一年的暑假都有多啦A夢大電影上畫, 哲哲這樣喜歡, 當然要去睇, 呢日我地去睇德仔, 哲哲大個仔了, 睇戲時大部份都睇得明套戲講乜, 細佬比起上年也懂事很多, 睇動畫聽埋旁白都很理解, 一開始入去睇黑炆炆既「 大電視」係有d驚, 不過很快就好投入, 兩兄弟一路睇一路食零食, 不知幾爽!

Picture

天氣太熱了, 爸爸依家無得放平日, 去唔到沙灘游水, 近近地第一次膽粗粗帶兩隻臭豬去泳池游. 一拖二不是擔心梳洗麻煩, 不是擔心車程長拎好多野轉車等車訓著覺要抱攞苦黎辛, 而係擔心睇唔掂兩個, 嬉山莫嬉水發生危險. 可幸哲哲同細佬都好乖, 去bb池時雖然哲哲好悶, 但都肯一齊行動怕走漏眼, 到習泳池輪到細佬無野玩但都會忍耐, 兩個都抵錫~

Picture

哲哲一直都好想去bumble tots度玩, 不過暑假期間收費不便宜, 見哲哲同細佬好恨玩, 難得一年先玩得一次, 一於豪一豪佢. 斷估唔到一個小小既地方都可以不停咁玩足八個鐘, 中途我們只在7-11吃了幾件蛋糕仔同維他奶, 小朋友既精力真係無窮無盡, 而我既忍餓功力亦越見深厚, 百幾蚊由開鋪玩到收鋪, 夠晒皮囉...

Picture

終於等到爸爸放假而又唔洗為裝修一事而舉家出動, 上年去斧山道泳池見到室內池有海盜船好想玩, 不過維修期間關閉未有機會玩, 今次去到有得玩, 我們都玩到好盡興, 細佬仲倦到食食下lunch訓著添, 哈哈!

Picture

暑假流流長, 緊係要約埋好朋友一齊去玩啦! 呢日約左朋友仔一齊到沙田睇戲再到ikea運吉, 前一秒個個斯斯文文幾可愛, 下一秒就原形畢露...好在人少少無比人鬧~

Picture

逢星期三好多展館都免費參觀, 近近地我地去左兒童探知館搞搞震, 一身農民和店小二既裝束真係好得意, 咁簡單既展館都玩大半日, 之後仲上埋樓上既粵劇展館同李小龍館, 輕輕鬆鬆嘆住冷氣享受了美好的一天

Picture

又黎打搞表叔一家喇! 呢日我同哲爸又要出動搞裝修野, 於是放低哲哲去表叔屋企玩兼過夜, 哲哲真係大個仔啦, 仲記得兩年前去表叔過夜仲要著尿片, 依家唔洗囉, 仲可以同表叔表姑玩d要用腦既game, 唔係只係打機低低bb lu~~

仲左玩, 這個暑假還有些有趣的生活片滴值得記住...

Picture

如常到圖書館閱讀樂, 剛好遇上幼稚園同學, 齊齊睇書有講有笑, 愛閱讀的都是好孩子~

Picture

仲比同學毒中玩呢D超人格鬥街機, 每日都要吵住買卡排隊對戰打機, 雖然望落有d無聊亦唔知有咩好玩, 不過做媽媽都要投其所好, 陪佢一齊癲, 一齊排, 一齊潛卡, 都係一件開心回憶黎

Picture

好久沒吃迴轉壽司了! 這天又破財, 帶細佬去見識一下. 哲哲固然開心有好野食, 細佬都覺得好得意, d壽司轉轉下, 仲好似神農氏嚐百草咁, 好吃放一旁, 不吃的又放一旁~

Picture

除左第一次食迴轉壽司之外, 游完夜水, 第一次三母子去吃甜品, 賴低仍在加班的爸爸去爽一爽, 爸爸看得牙癢癢呢, 哈哈

Picture

遊戲室幾乎每日都幫襯, 就算不是暑假, 我們一星期總有三四日會到圖書館和遊戲室放電. 趣怪既細佬做出多個高難道動作, 唔通想做彭丹接班人?! XDDDD

Picture

這張相的由來就是兩兄弟行過吵著要玩彈彈波, 還竟然齊齊彈到三連中, 送貼紙一張~

Picture

一連下了幾天雨, 難得有陽光, 幾曬幾熱都好, 都要出黎曬下d懶蟲, 踩轉單車先, 不過我就辛苦囉, 細佬懶踩, 成日要我推, 好倦呢~

Picture

超級市場是我們最喜歡去的地方, 一車過, 載人又載貨, 齊齊掃零食, 哲哲有自主權話事揀小息零食外, 又可以學到budgeting, 細佬又可以多點認識生活事物, 幾好~

Picture

傻瓜一二號, 一張賣旗貼紙仔都玩得咁開心~

Picture

不得不說細佬最近練成神技, 好鐘意邊行邊食飯, 真係比佢激死!

Picture

小b大任務! 平時我地為哲哲準備早餐, 呢個暑假哲哲有機會孝敬返我地轉頭. 比左廿蚊, 一部電話, 就自己落樓為我們買麵包做早餐, 任務成功! 細佬都唔執輸, 一樣敢開口自己買麵包, 叻仔丫~

今個暑假過得很豐盛, 唯一是沒有機會去沙灘, 令哲哲失望了, 希望來年暑假繼續玩個夠, 到時細佬再大個d, 帶住佢周圍去可以玩更多野, 更開心了~


[1]

好Happy嘅暑假,Maggie你咁忙仲可以帶兩兄弟周圍去,勁!

boosaa
[引用] | 作者 boosaa | 24th Sep 2014 2:57 AM | [舉報垃圾留言]


無喇, 真係可以出去玩, 唔洗搞學校同裝修野得幾星期, 仲要有時落下雨, 所以唔算玩得好多, 不過今年暑假一定難忘, 因為好"充實", 哈哈

[引用版主回覆] | 作者 Maggie | 29th Sep 2014 1:28 AM